Gen 45 | WSK | STEP | Joseph ko noman magara ningi la ago bagurukko me terong, se nu ko ura kari nunga maonam, “Nina suen la aratalko,” mam. Se nu kota ko launuria arungak baga se numi balam.

Genesis 45

Joseph ko launuria nongote numi wetang te beteram

1 Joseph ko noman magara ningi la ago bagurukko me terong, se nu ko ura kari nunga maonam, “Nina suen la aratalko,” mam. Se nu kota ko launuria arungak baga se numi balam. 2 Ale biyala niakaso, se Egypt kari ago iki gilingiman. Se nu niakaso mu ko den pagam king ko kawam te ago namaram se ikiman.

3 Joseph ko launuria nunga maonam ale balam, “Ani Joseph!” mam. “Aga ait kueram agi am bagoso e?” Bare ko laun ari noko ninguru nguangakasan, ale noko den koma balmonko me terong. 4 Se Joseph nunga maonam, “Aningate pingi tairalko,” mam. Se nuna kote pingi namaman se balam, “Ani Joseph, nenenga uria, ulengkala nina Ishmael alo arungak aga diaman se arungu Egypt tairem borta. 5 Bare nina aitak umu ko me dolaral nguangaralko, ale nengemang me batagukko. Kaem ani te kariimet nunga sanguk se me kuemonko aninga beteram se girem ewerete tairem. 6 Yar ilagala karak biya sor imi te aniram. Bare karak imi ko yar 5 tala am aniso, se kariimet ningam ningi na inang gimonko me terong. 7 Nina te ninga sangik se yawarakala bagaralko Kaem aninga beteram se girem tairem, nenenga ninimas ari, nenenga taleng girigir, ninga gue te me menarukko.

8 “Se nina ani me aga beteman se tairem. Mena. Kaem kota aninga beteram se tairem. Kaem ani Pharaoh bowa ningi kari biya ko aga beteram. Ani ko kawam te kariimet nunga bitarsam, ale Egypt kariimet suen biya nunga kari biya ani bagasam. 9 Se peleral tairate aga ba kote namaral ale iwita maonalko: ‘Ka kuriang Joseph iwita balam: Kaem nu Egypt wonong suen biya ko kari biya ko beteram se bagoso ma balam. Ni me kimi bitar, tairatela kote namarko balam. 10 Se ni namar sor Goshen mu te nu kumik duap te bagerko balam. Ni se, ana ka kuriang iton, ka nimasari, se ka bulmakau, sipsip, belelek, se ka mel suen la karogo sor Goshen mu te namanak daginakko balam. 11 Ni sor mu te ana nangarak dagi, mu nu ka bituokko mam. Karak biya ko yar 5 tala udagi aniso, nu ni se, ana ka kuriang imas ago, ka bulmakau sipsip mel arungu na ko kuenak bore ko balam.”’

12 Joseph ko laun ari uwuta ko nuet manarmonko balam, asele nunga maonam, “Nina se, aga uria Benjamin, nina ani agarkal ale aga ikialko, imi anigita Joseph nengerak munakawasam. 13 Aninga ait maonalko, aitak ani Egypt ningi aga aip biya ma balalko, ale mel suen biya nina aringiman mu ago maonalko. Aria, tairate namaral ale ilak tairalko.”

14 Ale Joseph ko uria Benjamin yasaram, ale ilak niakaso. Se Benjamin agotala niakaso. 15 Joseph nia se ko launuria nunga ilukaso ale nogol misikikaso. Asele ko launuria ilak munakakasan.

16 Pharaoh ko kari supuling saki karogo Joseph ko laun ari taiman mu ko den ikiman ale ko ninguru amilmilakasan. 17 Se Pharaoh Joseph maonam, “Ka launuria nunga manaru se melmasak gi donkey te awumon ale pelemon Canaan namomonko,” mam. 18 “Ale nunga nonet se nunga imet kuriang suen la nunga gimon ale arungu taimonko. Se ani Egypt ningi ali sor bo ningo nuam mu nungarik se nuna sor mu te na yu ningo nuam te no se bagomonko.

19 “Ni nunga manaru se Egypt nongote karis sang gimon ago namomon ale nunga imet kuriang te arungu taimonko. Nunga manaru se nunga nonet ago gimon ale ilak taimonko. 20 Iwita nunga manaruko, nunga mel Canaan awu betemon mu ko ikia me nunga morukko. Mu awuk, Egypt ningi mel ningo nuam mu nungarikko.”

21 Se Jacob ko kuriang Pharaoh balam butata bita gilingiman. Joseph Pharaoh balam butata karis sang nungaram, ale na sang lage te namonko mu ago nungaram. 22 Ale ko laun ari suwan suwan guang nagumonko mu nungaram. Bare Benjamin guang 5 tuam, ale manga silver 300 tuam. 23 Ale Egypt ningi mel ningo ningo mu gi donkey kari 10 mu awete nunga awuram, ale ko nuet ko beteram se ago namaman. Ale na wheat, se bread, se na inang sang ko nuet lage te no se Egypt tairukko, mu gi donkey imet 10 mu nunga awete awuram, se giman ago namaman. 24 Joseph ko launuria nunga beteram se namakasan, se iwita nunga maonam, “Lage luan te den me tagiral gurugumuralko,” mam.

25 Se nuna Egypt beteman ale nunga nonet kote Canaan nama laga arataman. 26 Ale balman, “Joseph me kueram! Nu marak bagoso! Ale Egypt ali sor suen la nu bitarso,” ma balman. Bare Jacob den mu ikiam biririkiram ale me ko gomang ningi nunguning aram. 27 Se nuna Joseph den suen biya nunga maonam mu manorman se ikiam. Ale nu karis, nu te peleruk Egypt namurukko Joseph beteram se ago taiman mu arigam ale ninguru amilmilakaso. Ale balam, “Nunguningta nunguning! Aitak ani ikiem, aninga kuriang Joseph am marak bagoso! Se ani namirik arigek asele udagi kuerikko,” ma balam. ^{▼▼Gen 45:28 Joseph ko den sang Acts 7:6-16 mu te aniso.}

28